PSJ Braziliyadan yangi iste'dod topdi

«Palmeiras» jamoasida to‘p surib kelayotgan yosh havbek Luis Felipe Pacheko yaqin vaqtlarda Yevropaning yetakchi klublaridan biriga yo‘l olishi mumkin. Bu haqida Terra nashri xabar bermoqda.

Manba ma’lumotlariga ko‘ra, 18 yoshli tayanch yarimhimoyachiga eng jiddiy qiziqishni Fransiyaning «PSJ» klubi bildirgan. Shuningdek, futbolchini o‘z safiga qo‘shib olish niyatida Ukraina chempioni «Shakhtyor» ham bor.

Shu bilan birga, «Palmeiras» hozircha Pacheko bilan xayrlashishga shoshilmayapti. Braziliya klubi rahbariyati va murabbiylar shtabiga ko‘ra, yosh iste’dod eng avvalo o‘z yurtida to‘liq ochilishi, mahalliy chempionatda yanada o‘sishga erishishi kerak. Shundan so‘nggina Yevropaga yo‘l olish masalasini ko‘tarish mumkin, deb hisoblashmoqda.

Joriy mavsumda Pacheko asosiy jamoa safida 11 ta o‘yinda maydonga tushdi. U hali gol yoki golli uzatma bilan ajralib tushmagan bo‘lsa-da, mutaxassislar uning o‘yinida katta salohiyat ko‘rishmoqda.