ПСЖ Торрес билан шартнома имзолашга яқин

«Барселона» ҳужумчиси Ферран Торрес катта эҳтимол билан фаолиятини «Пари Сен-Жермен» жамоасида давом эттириши кутилмоқда.

Diario Sport нашри ёзишича, томонлар футболчининг трансфери бўйича келишувга эришган. Каталония клуби ёзда янги марказий ҳужумчи олиб келишни режалаштираётгани сабабли, 26 ёшли испан футболчиси билан хайрлашишга тайёр. Шунингдек, Ферран Торрес билан шартномани узайтириш бўйича музокаралар ҳам режада йўқ, амалдаги келишув эса келаси йилнинг ўрталарида ўз ниҳоясига етади.

Transfermarkt портали мутахассислари Торреснинг бозор қийматини 50 миллион евро атрофида баҳоламоқда. Ўтган мавсумда у Ханс-Дитер Флик бошқарувидаги жамоа сафида 49 ўйинда майдонга тушиб, 21 та гол урди ва 3 та голли пас муаллифига айланди.