“Қўқон-1912” икки футболчи билан шартнома имзолади. Улардан бири Африкадан (Фото)

Келаётган мавсумга тайёргарликни Тошкент шаҳрида олиб бораётган “Қўқон-1912” жамоаси ўз сафига икки нафар футболчини расман қўшиб олди. Бу ҳақда клуб матбуот хизмати хабар берди.

Жамоа кўригида бўлиб турган Дидье Дрогбанинг ватандоши бўлмиш Якуба Бамба, энди расман “шунқор”га айланди. Қўқонликлар раҳбарияти Кот-д’Ивуар давлатидан келган футболчи билан мавсум якунига қадар шартнома имзолади. Ҳужумкор ярим ҳимоячи, Якуба Бамба жамоа сафида 91-рақамда майдонга тушадиган бўлди.

Шунингдек, “Бунёдкор” футбол клуби тарбияланувчиси бўлган Сардор Азимов ҳам келаётган мавсумни Бахтиёр Ашурматов қўл остида ўтказади. Азимов 13-рақамда майдонга тушади.

Ярим ҳимоя чизиғи вакили бўлган бу футболчи олдинги мавсумларда Суперлиганинг “Бунёдкор”, “Навбаҳор”, “Сўғдиёна”, “Андижон” каби клубларида тўп тепиб, бирмунча тажриба орттирган.