Қозоғистондаги ҳангома ёхуд Бобур Тагиев чемпион!

25 октябрь куни Қозоғистоннинг Алмати шаҳрида “Бушидо Қозоғистон” промоутерлик лигаси томонидан К-1 йўналишида катта турнир ўтказилди. Биз учун аҳамиятли жиҳати, ушбу турнирда уч нафар ҳамюртимиз Бобур ва Жамшид Тагиев ҳамда Санжар Саидмуродов иштирок этди. 71 кг вазн тоифасида супер саккизлик, яъни KOK (King of Kings) чемпионлик жангларида Бобур Тагиев барча рақибларини мағлуб этиб, чемпионлик мақомига кўтарилган бўлса, 75 кг вазнда "Super Fight" йўналишида Жамшид Тагиев иккинчи ўринни қўлга киритди.

Мазкур турнирда баъзи ажаблантирадиган воқеликлар ҳам юзага келди. Жумладан, Бобур Тагиев финал жангида мезбон Жонибек Канатбоевни мағлуб этди. Ғолиб номини россиялик машҳур бошловчи Александр Загорский эълон қилди. Кутилганидек, Загорский ҳамюртимизнинг ғалабасини эътироф этди. Шунда рингга турнир ҳомийларидан бири кўтарилиб, бу ғалаба ҳаққоний эмаслигини, ён ҳакамларни барчаси ўзбекистонлик эканлигини маълум қилиб, ғалаба Канатбоевники, дея эълон қилди. Шундан сўнг, рингга Ўзбекистон К-1 федерацияси раиси Жасурбек Неъматов чиқиб келди ва ҳакамларнинг бири афғонистонлик, бошқаси эса қозоғистонлик эканлигини айтиб, ўзбек жангчиси адолатли ғалабага эришганини маълум қилди. Хуллас, каттагина машмаша юзага келди. Биз ушбу можаро нима билан тугаганлигини билиш мақсадида Жасурбек Неъматов билан боғландик.

- Биласизми, бевосита ушбу турнирни ўзбекистонлик мухлислар ҳам Youtube тармоғи орқали томоша қилишди. Шунинг учун барчасини ўз кўзлари билан кўрган юртдошларимиз кўплаб топилса керак. Бобур катта устунлик билан ғалаба қозонди. Супер саккизлик турнири жуда қийин эканлигини аксарият мухлислар яхши билади. Бир куннинг ўзида уч маротаба жанг ўтказади. Бобур ҳақиқий маҳорат эгаси эканлигини исботлаб, рақибларига ҳеч қандай имконият қолдирмади. Албатта, финалда мезбонлар вакилини мағлуб этганидан сўнг, шундай ҳолат юзага келди. Ваҳоланки, бизни ва ҳакамларимизни таклиф қилган асосий ташкилотчилар билан кўп йиллик қадрдонмиз... Улар бизга ишонишади. Рингга чиқиб келиб, барча ҳакамлар ўзбекистонлик эканини айтган одам ҳомийлардан бири эди, холос! Шундай бўлса-да, чиқиб, финал жангида ишлаган икки ён ҳакам афғонистонлик ва мезбонлар вакили эканлигини исботлаб бердим. Бир сўз билан айтганда, биз ўз спортчимизнинг манфаатларини ҳимоя қила олишимизга ишонч ҳосил қилди. Якунда, барчаси ижобий кўриниш олди.