Қозоғистоннинг Қизилўрда шаҳрида ММА турнири бўлиб ўтди

Қизилўрда шаҳрида "Sarbaz fight" ММА турнири бўлиб ўтди. Ушбу турнир ўз анъанасига эга бўлиб, унда Осиёнинг энг кучли жангчилари иштирок этишади. Мазкур жанг кечасида уч нафар ҳамюртларимиз ҳам ўз омадини синаб кўрдилар. Жумладан,  63 кг ваз тоифасида Мухаммад Юсуф Умаров, 66 кгда Алишер Қаюмов, 77 кг вазнда эса, Иброхим Худойқуловлар иштирок этишди. Улар орасида Иброхим Худойқулов рақибини мағлубиятга учратиб, турнир камарини қўлга киритди. Афсуски, Алишер Қаюмов имкониятни бой бериб қўйди. Мухаммад Юсуфга ҳам гарчи мағлубият ёзилган бўлсада, аслида у бутун жанг мобайнида рақибидан устунлик қилган эди. Ўзига хос мезбонлик фактори юртдошимиз зарарига ишлади десак муболаға бўлмайди.