Quvondiq Ro‘ziev: "Navbahor"ga keyingi o‘yinlarda omad tilayman!"

“Navbahor”ning 27 yoshli mahoratli yarim himoyachisi Quvondiq Ro‘ziev yaqinda jarrohlik amaliyotini boshidan o‘tkazdi va ayni paytda shifoxonada davolanmoqda.

Biz futbolchi bilan qo‘ng‘iroqlashib, undan hol-ahvol so‘rash asnosida qisqacha intervyu oldik. Quvondiq o‘z holati borasida quyidagi so‘zlarni gapirdi:

- Avvalo, “Navbahor”ning barcha muxlislari, klub vakillari, jamoadoshlarimga o‘z salomimni yo‘llayman. O‘tgan yilgi mavsumda olgan jarohatim anchadan buyon bezovta qilayotganligi bois, 23 oktyabr kuni Toshkentdagi Shox international Hospitalda jarrohlik stoliga yotdim va Xudo shukr, operatsiya muvaffaqiyatli o‘tdi. Ayni paytda davolanish jarayonini boshimdan o‘tkazyapman. Shifokorlarning aytishlaricha, yashil maydonga bir yarim oydan so‘ng, qaytar ekanman. Shu bois, jamoamizga keyingi o‘yinlarda yordam bera olmasligimdan afsusdaman. 

Joriy mavsum davomida jarohatim bezovta qilganligi bois, “Navbahor”da o‘z imkoniyatim darajasida to‘p tepa olmadim. Jamoamizga qolgan o‘yinlarda omad yor bo‘lib, bu yilgi mavsumni kuchli beshlikda yakunlashini tilab qolaman.

Baxtimizga “Navbahor” muxlislari doimo sog‘-salomat bo‘lishsin.

“Navbahor” PFK matbuot xizmati