Рангник «Милан»га ўз талабларини қўйди

«Милан» раҳбарияти Германия футболида катта тажрибага эга мутахассис Ральф Рангникни спорт директори лавозимига таклиф этмоқда. Аммо Рангник бу таклифни фақат ўзи белгилаган бир қатор шартлар бажарилган тақдирдагина қабул қилишга тайёр. Бу талаблар сони ҳам кам эмас.

Аввало, мутахассис клубда кадрлар сиёсати бўйича тўлиқ мустақилликка эга бўлишни истамоқда. Яъни бош мураббийни танлаш, футболчиларни селекция қилиш ва машғулот усулларини белгилаш масалаларида қарор қабул қилиш ҳуқуқи тўлиқ унинг қўлида бўлишини талаб қилмоқда.

Иккинчидан, Рангник «Милан» тизимига ўзининг ишончли мутахассислар гуруҳини олиб киришни режалаштирган. Манбаларга кўра, гап камида йигирма нафар ходим ҳақида кетмоқда – улар орасида селекциячилар, аналитиклар ва спорт илмий-тадқиқот йўналишида ишлайдиган мутахассислар бўлиши кутилмоқда.

Учинчи муҳим йўналиш – клубнинг болалар ва ўсмирлар академиясини тубдан ислоҳ қилиш режаси. Айнан шу нуқтада Рангник режалари «Милан»да катта нуфузга эга бўлган Златан Ибрагимовичнинг манфаатлари билан тўқнаш келаётгани айтилмоқда.

pianetamilan.it нашри ёзишича, швед юлдузи клубдаги таъсир доирасини йўқотиб қўйишдан жиддий хавотирда. Рангникка кенг ваколатлар берилиши Ибрагимовичнинг қарор қабул қилиш жараёнларидаги роли сезиларли даражада қисқаришига олиб келиши мумкин.