Rasman! Javohir Sidiqov "Nasaf" klubiga ko‘chib o‘tdi

Iqtidorli futbolchi Javohir Sidiqov yangi mavsumni Qarshining "Nasaf" klubida davom ettiradigan bo‘ldi. Bu xususida "Qo‘qon-1912" matbuot xizmati xabar qilmoqda. 

Unda yozilishicha, qo‘qonlik muxlislarning sevimli futbolchisi, ikki karra Osiyo chempioni, muxlislar ta’biri bilan aytganda "qo‘qonlik Messi”, Javohir Sidiqov kelayotgan mavsumni Qarshining “Nasaf” jamoasida o‘tkazadigan bo‘ldi.

Bu borada har ikki klub rahbarlari o‘zaro kelishuvga erishdilar. Javohirga Cuperliganing ko‘plab jamoalaridan takliflar bo‘ldi. Bunday futbolchini har qanday jamoa ham o‘z safida ko‘rishni istashi aniq.

Shuningdek, xabarda yana shunday deyiladi: bu xabar ko‘pchilik muxlislarimizga yoqmasligi tabiiy. Lekin biz Javohir Sidiqovning darajasini ushlab turish, unga OChL musobaqasida ishtirok etish imkonini taqdim qilish hamda mamlakatimiz terma jamoasiga nomzod futbolchi ekanligini hisobga olib mana shunday qarorga keldik.

Javohir Sidiqovning transferi bo‘yicha barcha huquqlar “Qo‘qon-1912” jamoasida saqlanib qoladi. Umid qilamizki, Javohir yanada tajribasini oshirib, yangi jamosida ham o‘z o‘yinlari bilan barchamizni xursand qiladi. Javohir Sidiqov uchun “Qo‘qon-1912” jamoasining eshiklari doim ochiq bo‘ladi", - deyiladi matbuot xizmati tarqatgan xabarda.