Расман! Василий Ломаченконинг жанг санаси ва рақиби аниқ бўлди

Профессионал бокс оламида таниқли номлардан бири ҳисобланган 3 вазнда собиқ жаҳон чемпиони Василий Ломаченконинг навбатдаги жанг санаси маълум бўлди. У 26 июнь куни япониялик Масаёши Накатанига қарши рингга кўтарилади. Жанг Лас-Вегас шаҳридаги "Virgin Hotel" меҳмонхонасининг спорт аренасида бўлиб ўтади.

Ломаченко (14-2, 10КО) 2020 йил октябрь ойида Теофимо Лопесдан учралган мағлубиятидан сўнг, ҳали рингга кўтарилгани йўқ. 33 ёшли украиналик ҳамон ўз дивизионида 2-рақамли боксчи сифатида эътироф этилмоқда.

Накатани (19-1, 13 КО) эса, Ломаченко учун хавфли рақиб бўлиши кутилмоқда. У мазкур дивизиондаги энг бўйи баланд ва гавда тузилиши йирик бўлган жангчилардан бири. Накатани 2019 йил декабрь ойида Теофимо Лопес билан жангда 12 раунд давомида анчагина қийинчилик туғдира олган эди.