“Реал” “Барса” ғоясини янчиб ташлади

Ла Лига раҳбарияти чемпионатнинг 17-туридан ўрин олган “Вильярреал” ва “Барселона” ўртасидаги учрашувни АҚШнинг Майами шаҳрида ўтказиш ғояси бекор бўлганини маълум қилди. Бу учрашув 20 декабрга мўлжалланган эди.

- Ла Лига испан футболини интернационализация қилиш имконини берувчи ушбу ажойиб ва тарихий лойиҳанинг амалга оширишни имкони бўлмаганини чуқур афсус билан маълум қилади.

Расмий учрашувни мамлакатимиз сарҳадларидан ташқарида ўтказиш миллий чемпионатимиз кенгайишига, клубларимизнинг халқаро тажрибаси ошишига, ўйинчиларимизнинг янада кенгроқ танилишига, испан футболи брендини АҚШдек стратегик бозордаги мавқеини мустаҳкамлаш йўлида ҳал қилувчи қадам бўларди, - дейилади Ла Лига баёнотида.

Бу баёнот Майамидаги учрашув ташкилотчилари тадбирни юқори даражада ўтказиш учун вақт етишмаслигини ва шу сабаб ўйинни ўтказиш имкони йўқлигини маълум қилганидан кейин берилди.

Айтиш жоизки, каталонияликларнинг ташаббуси бўлган чемпионат ўйинларини хорижда ўтказиш ғоясига “Барселона”нинг ашаддий рақиби “Реал” жиддий қаршилик кўрсатаётган эди.