"Реал" бир дақиқа ҳам ўйнамаган тарбияланувчиларидан 100 миллион евродан ортиқ даромад қилди

Мадриднинг «Реал» клуби 2025/26 йилги мавсумда асосий жамоа сафида бирорта ўйин ўтказмаган тарбияланувчиларини сотиш орқали 108 миллион евро даромад кўрди. Бу ҳақда Marca нашри хабар бермоқда.

Маълумотларга кўра, ушбу маблағлар ёзги трансфер ойнасдаги барча харажатларни тўлиқ қоплади. Жумладан, Марк Кукурелья ва Дензел Дюмфриснинг трансфери, шунингдек, Жозе Моуриньони «Бенфика»дан олиб келиш учун тўланган товон пули айнан шу даромад ҳисобига қопланган.

Энг катта тушум Нико Пас трансфери орқали қайд этилди. «Реал» уни «Комо» клубига 60 миллион евро эвазига сотди. Бу мадридликлар тарихида тарбияланувчи сотуви бўйича иккинчи энг йирик битим ҳисобланади. Рўйхатда биринчи ўринда Альваро Мората турибди. Шу билан бирга, «Реал» Нико Пасни келажакда қайта сотиб олиш ҳуқуқини сақлаб қолган.

Яна 20 миллион евро Виктор Муньоснинг «Ливерпул»га ўтиши орқали келди — унинг шартномасида кўрсатилган товон пулининг ярми Мадрид клубига тегишли бўлган. Шунингдек, «Реал» «Милан»га йўл олган Марио Хиль учун 15 миллион евро, «Борнмут» футболчисига айланган Альваро Родригес учун яна 15 миллион евро ишлаб олди. Марио Мартиннинг сотилиши эса клубга қўшимча 3,5 миллион евро даромад келтирди.

Кутилишича, бу рақам яна ошиши мумкин. Испаниянинг иккинчи дивизионида энг кўп гол урган футболчи Серхио Аррибас тез орада «Альмерия»ни тарк этиши мумкин. Унга «Бенфика» жиддий қизиқиш билдирмоқда. Агар ушбу трансфер амалга ошса, «Реал» қўшимча равишда яна 12 миллион евро ишлаб олиши мумкин.