“Реал” ҳимоячидан беш ойга айрилди

“Реал”нинг қанот ҳимоячиси Ферлан Менди яқинда “Эспаньол”га ўтказилган Ла Лиганинг 34-тур учрашувида олган сон жароҳати сабабли узоқ муддатга сафдан чиқди.

Cope нашрининг маълумотига кўра, футболчига жарроҳлик амалиёти таклиф этилган.

Агар Менди рози бўлса, операциядан кейин тикланиш учун тахминан беш ой талаб этилади.

Жорий Испания Ла Лигаси мавсумида Ферлан бор-йўғи бешта ўйин ўтказган. Кейинги пайтда жароҳатлардан азият чекаётган ўйинчи тобора жамоадаги ўрнини йўқотиб бормоқда.

30 ёшли ҳимоячи “Қироллик клуби” сафида 2019 йилдан бери ўйнаб келади. Унинг клуб билан келишуви 2028 йил июнь ойи охиригача амал қилади.

Француз футболчисининг бозор қиймати олти миллион еврони ташкил этади. Клуб ёзда уни сотиб юборишни режалаштираётган эди. Энди ўйинчининг келажаги жароҳатидан тузалиб сафга қайтганидан кейин ҳал этилади.