“Реал” президентлигига номзод: “Негрейра иши бўйича “Барселона” жазоланмади”

“Реал” президентлигига номзод Энрике Рикельме “Барселона”нинг Негрейра иши бўйича жазодан қутулиб қолганига Суперлига лойиҳаси таъсир қилган деб ҳисобламоқда.

Эслатиб ўтамиз, 2023 йилда “Барселона” ва клуб раҳбарияти Испания Қироллик футбол федерацияси ҳузуридаги ҳакамлар техник қўмитаси собиқ вице-президенти Хосе Мария Энрикес Негрейрага тўловлар амалга оширгани учун пора беришда айбланган эди.

Рикельме бу борада қуйидаги фикрларни билдирди:

“2024 йилги Бош ассамблеяда ‘бизга кучли “Барса” керак’ деган гап айтилганди. Ўша вақтда Негрейра иши аллақачон маълум бўлиб улгурган эди.

Маълум маънода, Негрейра иши ҳеч қандай натижа бермаслигига қизиқиш бўлган. Аммо “Барселона” Суперлига лойиҳасидан чиққанидан кейин бу масала яна жиддий муҳокама қилина бошланди.

Эҳтимол, “Барселона”нинг Негрейра иши бўйича умуман жавобгарликка тортилмаганининг сабаби — муаммони ҳал қилиш учун бошиданоқ керакли чоралар кўрилмаганидадир. Агар шундай қилинганида, натижа бошқача бўларди”, — деди Рикельме.