“Реал” таркиби қанча туради? “Барса”никичи?

Transfermarkt портали Ла Лига клубларида ўйнаётган футболчиларнинг трансфер нархлари янгилади. Бунинг ортидан Испания чемпионати юқори дивизионида иштирок этаётган клубларнинг умумий нархларида ҳам ўзгариш бўлди.

Манбага кўра, бугунги кунда Испанияда энг қиммат таркибга эга жамоа “Реал” бўлиб турибди. “Қироллик клуби” билан шартномага эга футболчиларнинг умумий нархи 1,4 миллиард еврони ташкил қилди.

Амалдаги чемпион “Барселона” таркибига ҳам ҳавас қилса арзийди. Германиялик бош мураббий Ханс-Дитер Флик умумий қиймати 1,1 миллиард евро бўлган жамоага устозлик қилмоқда.

“Реал” ва “Барселона” билан бир неча йилдан буён рақобатлашиб келаётган “Атлетико” жамоаси ўзида жами 624 миллион евро турадиган футболчиларни жамлаган.

Асосан баск миллатига мансуб чарм тўп усталарига таянадиган “Атлетик Бильбао”да бугунги кунда 370 миллион евролик таркиб ўйнаяпти. Кучли бешликка кирган “Вильярреал”нинг жами ўйинчиларининг нархини қўшиб ҳисоблаганда, бу сумма 284 миллион еврони ташкил қилди.