"Реал ТВ" "Талавера"га қарши ўйин ҳакамининг "Атлетико" мухлиси эканига ишора қилди

"Реал" клубининг телевидениеси "Талавера"га қарши ўйинни бошқарадиган ҳакамнинг қайси жамоага мухлислик қилиши мумкинлиги борасида ишора қилди.

Испания Кубоги 1/16 финали доирасидаги "Талавера" — "Реал" учрашуви 17 декабрь куни бўлиб ўтади.

— Эртанги ўйинни Гильермо Куадра Фернандес бошқаради — "Негрейранинг ўғли". Миш-мишларга кўра, у мадридлик бир жамоага мухлис, аммо бу "Реал" эмас, "Хетафе" эмас, "Райо Вальекано" эмас ва "Леганес" ҳам эмас, — деди "RMTV" бошловчиси.

Шу тариқа, "Real Madrid TV" ҳакамнинг "Атлетико" мухлиси эканига ишора қилди. Маълумки, "Атлетико" — "Реал"нинг принципиал рақиби ҳисобланади.

Эслатиб ўтамиз, 2023 йилда "Барселона" ва унинг раҳбариятига ҳакамлар техник қўмитасининг (CTA) собиқ вице-президенти Хосе Мария Энрикес Негрейрага тўловлар билан боғлиқ пора олиш айблови қўйилган эди. У Испания футбол федерациясида (RFEF) фаолият юритган. Суд "Барселона" томонидан 2001–2018 йиллар оралиғида Негрейрага тўланган 7,7 миллион евро маблағни жиноят деб баҳолаган.