“Реал” учун ўйнамайман!

“Реал Сосьедад” етакчиси Мартин Субименди бир неча мавсумдан бери Европанинг гранд клублари эътиборини ўзига қаратиб келади.

Баск миллатига мансуб ўйинчига даъвогарлар орасида “Реал Мадрид” ҳам бор эди. Fichajes нашрининг ёзишича, Мартин ҳеч қачон “Реал”га ўтмаслигини таъкидлади.

Футболчининг бу қарори Англия грандларига маъқул келди. “Арсенал” таркибини кучайтириш учун Субименди учун катта харажат қилишга тайёр.

FutbolFantasy вакилларининг маълум қилишича, аслида Субимендининг шартномасида 60 миллион евролик бадал пули кўрсатилган. Лекин “канонирлар” бу суммага яна беш миллион евро қўшиб беришга рози. Фақат улар испан клубидан тўловни бир неча қисмга бўлиб тўлашга рухсат беришни сўраяпти.

Лондонликлар бош мураббийи  Микель Артета 26 ёшли ҳамюрти жамоага келиб, майдон марказидаги устунликни таъминлашда катта ёрдам беришига ишонмоқда.