“Реал” ва “Барса” жаҳон чемпионини талашяпти

Аргентина миллий терма жамоаси сафида Америка кубоги, Финалисимма ва жаҳон чемпионатида ғолиб чиққан марказий ҳимоячи Кристиан Ромеро фаолиятида жиддий ўзгариш ясаши мумкин.

Маҳоратли футболчи ўз юртида ва Италиядаги фаолиятидан кейин 2021 йили Лондоннинг “Тоттенхэм” клубига келган эди. Энди Ромеро Испания чемпионатига йўл олиши кутилмоқда.

Mundo Deportivo нашри журналистларининг маълумотига кўра, футболчи хизматларига Мадриднинг “Реал” клуби жиддий қизиқмоқда. “Қироллик клуби” ёзги трансфер ойнасида уни жамоага қўшиб олишга уриниб кўрадиган бўлди.

Шунингдек, Ромеронинг ишончли ўйинини юқори баҳолаётган “Реал”нинг ашаддий рақиблари – “Барселона” ва “Атлетико Мадрид” жамоалари раҳбарияти ҳам аргентиналик юлдузни ўз сафига чорламоқда.

27 ёшли ҳимоячининг амалдаги меҳнат шартномаси 2029 йил ўртасигача мўлжалланган. Футболчининг бозор қиймати 60 миллион еврога баҳоланаётган бўлса-да, “Тоттенхэм” ўз сардорини анча қимматроқ сотишни мўлжаллаяпти.