“Real” va “Barsa”: Xolandni olish yo‘li bormi?

“Manchester Siti”ning asosiy to‘purari Erling Xolandni hozirgi jamoasida hamma narsa qoniqtiradi. Norvegiyalik hujumchi klub bilan 2034 yilning yarmigacha davom etadigan mehnat shartnomasiga ega.

Xoland ana shu kelishuv asosida Angliya Premer-ligasida eng katta maosh oladigan o‘yinchi hisoblanadi.

Ammo Erlingning kelajak rejalarida Ispaniya chempionatida o‘ynash istagi bor. Aynan mana shu omil La Liga grandlari “Barselona” va “Real”ni tinch qo‘ymayapti.

Ayrim manbalar Xoland o‘tgan yili “shaharliklar” bilan hamkorlikni uzaytirganida shartnomadan uni sotib olish imkonini beradigan bandlar olib tashlanganini iddao qilmoqda.

Biroq Transfer News Live nashrining tasdiqlashicha,  “Real” va “Barselona” mutasaddilari bu ma’lumotga ishongani yo‘q. Har ikki klub ham “Manchester Siti” xo‘jayinlari 25 yoshli futbolchini qaysidir miqdordagi summaga qo‘yib yuboradi, deb hisoblaydi.

Eslatib o‘tamiz, Xoland dunyodagi eng qimmat futbolchilardan biri hisoblanadi. Transfermarkt uning qiymatini 180 million evroga baholagan.