“Реал” Винисиус ўрнини бошқа тўпурарга топширади

Европа матбуоти “Реал” раҳбарияти Винисиус Жуниор билан хайрлашишга тайёр экан ҳақида маълумот тарқата бошлади. Ўз ўрнида, мадридликлар бразилиялик юлдуз ўрнини боса оладиган ҳужумчи ҳам топиб қўйди.

The Athletic нашрининг маълум қилишича, агар Винисиус Жуниор клубни тарк этадиган бўлса, мутасаддилар унинг ўрнига “Манчестер Сити” тўпурари Эрлинг Холандни олиб келишга ҳаракат қилади.

“Қироллик клуби” аслида норвегиялик тўпурарни у “шаҳарликлар” сафига қўшилган 2022 йилдан аввал ҳам олишни режа қилган эди.

Винисиуснинг ўзи эса, клубнинг амалдаги шартномани 2030 йилнинг ёзигача узайтириш таклифини қабул қилмади. Ҳужумчига клуб ваъда қилган 15-20 миллион атрофидаги йиллик маош камдек туюлмоқда.

24 ёшли ҳужумчи йиллик меҳнатини 30 миллион еврога баҳолаяпти. Винисиусни Саудия Арабистони клублари ўз сафига чорлаяпти. Улар бразилиялик юлдуз беш йиллик шартнома имзоласа, бу муддат учун бир миллиард евро миқдорида маош беришга тайёр.