“Реал” хўжайинлари “Барса”га хат ёзган мураббийни ишдан ҳайдади

“Реал” раҳбарияти 17 ёшли футболчилар жамоасининг ёрдамчи мураббийи Адриа Диасни ишдан бўшатди.

The Athletic нашрининг ёзишича, Диас ўзи 2015-2019 йиллар давомида ишлаган “Барселона” клубига миннатдорлик мактубини ёзгани “Қироллик клуби” мутасаддиларига ёқмаган.

Мураббий ўз мактубида онаси саратон ҳасталигига чалинганида уни қўллаб-қувватлашгани учун раҳмат айтган ва клубга содиқлигини билдирган.

Энди “Реал” унинг шартнома бўйича кўрсатилган барча маошини тўлаб беради.  Диас “Реал” клубида бир неча ой муқаддам иш бошлаган эди.