“Реал”да кутилмаган муаммо чиқиб қолди

“Реал” бир қарашда энг кучли таркибга эга жамоадек кўринади. Жаҳон футболининг энг қимматбаҳо тўрт футболчисидан учтаси айнан мадридликлар шарафини ҳимоя қилади.

Шунга қарамай, янги мавсум олдидан Карло Анчелотти жамоасида ҳам таркиб масаласида муаммо чиқиб қолди.

Бу кўпроқ ҳимоя чизиғи билан боғлиқ. Жамоа сардори Начо Фернандес фаолиятининг сўнгги босқичида молиявий аҳволни яхшилаб олиш учун Саудия Арабистонига йўл олди. Оғир жароҳат олган Давид Алаба ҳали анчагача майдонга тушолмайди.

Ҳозир Карло Анчелотти ихтиёрида икки нафар марказий ҳимоячи – Антонио Рюдигер ва Эдер Милитао қолган.

Яқинда Хесус Вальехо ижарадан қайтиб, мавсумга “Реал”да тайёргарлик кўрмоқда. Бироқ бу ўйинчининг даражаси клуб олдига қўйган вазифаларни бажариш учун тўғри келмаслиги айтилмоқда.

 Экспертлар Карло Анчелотти мураккаб вазиятдан чиқиш учун бир неча позицияда ўйнай оладиган ярим ҳимоячи Орельен Тчуаменини орқа чизиқда ўйнатишини тахмин қилмоқда.