“Реал”га Холанд Мбаппедан муҳимроқ

“Реал” раҳбарияти ПСЖ форварди Килиан Мбаппедан кўра, “Манчестер Сити” тўпурари Эрлинг Холандни олиб келишни муҳимроқ санамоқда, деб ахборот тарқатди BolaSport нашри.

Манбанинг таъкидлашича, норвегиялик ҳужумчи маридликларнинг келаси ёздаги асосий нишони бўлади. Бунгача Холанд агар мадридликлар Мбаппени қўлга кирита олмаса, захира варианти сифатида тилга олинаётган эди.

Аслини олганда, “Реал” яқин келажакда ҳужум чизиғида Мбаппе ва Холандни бирга ўйнатишни режалаштираётган вариантлар ҳам борлиги айтилмоқда.

Яқинда Англия матбуоти Эрлинг Холанд “Реал”ни ёқтириши ва келажакда айнан мана шу жамоада ўйнашни режалаштираётгани ҳақида ёзганди.

23 ёшли форварднинг “шаҳарликлар” билан амалдаги шартномаси 2027 йилгача давом этади. Бироқ унинг битимида 180 миллион евро атрофида бадал пулини тўлаб, трансфер қилиш имконияти кўрсатилган банд бор.