“Реал”нинг голли серияси тўхтади

Испания чемпионатининг 22-турида амалдаги чемпион “Реал” Барселона шаҳридан қуруқ қайтди. Мадридликлар “Эспаньол” жамоаси меҳмони бўлиб, кичик ҳисобда имкониятни бой берди.

Аутсайдер жамоага мусобақа пешқадами устидан ғалаба келтирган ягона гол Карлос Ромеро ҳисобига ёзилди. Беллашувда Винисиус Жуниор томонидан киритилган тўп инобатга олинмади.

Шу тариқа, Карло Анчелотти шогирдларининг сафар учрашувларидаги голли серияси барҳам топди. Мадридликлар бунгача кетма-кет 31 та учрашув мезбон жамоалар дарвозасини ишғол қилиб келаётган эди.

“Реал”нинг сафар учрашувларда узлуксиз гол уриш бўйича рекорд 35 та ўйинни ташкил қилади. “Қироллик клуби” футболчилари 2016 йилнинг январидан 2017 йилнинг октябрига қадар рақиб майдонидаги 35 та ўйинда ҳеч бўлмаганда битта гол уриб келган.  

Бундан ташқари, “Реал” жорий мавсумда учинчи мағлубиятини тан олди. Ўтган йили жамоа чемпионат давомида фақат бир маротаба имкониятни бой берган эди.