“Реал”нинг трансфери барбод бўлди

Ёзги трансферлар даврининг сўнгги кунларида “Реал” раҳбарияти бош мураббий Хаби Алонсонинг ишончини қозана олмаган футболчилардан қутилишга ҳаракат қилмоқда.

“Қироллик клуби” мутасаддилари Дани Себальосни сўраган “Марсель” билан музокараларни ижобий якунлаган ва ўйинчини қўйиб юборишга розилик берганди.

Франциянинг етакчи клубларидан ҳисобланган “Марсель”  испаниялик ярим ҳимоячини кейинчалик 11 миллион еврога трансфер қилиш ва тўрт миллион евро бонус тўлаш шарти билан ижарага олишни таклиф қилди.

Бу вариант “Реал”га маъқул келди. Бироқ Дани Себальос охирги паллада “Марсель”га кўчиб ўтишдан бош тортди.

Манбаларда айтилишича, 29 ёшли футболчини Лига 1 даражаси қониқтирмаган ва у Франция чемпионатига ўтишни ортга ташланган қадам сифатида баҳолашини билдирган. Шу туфайли “Реал” келишган трансфер барбод  бўлди.