Рекорд трансфердан кейин сен “Сити”га керакмассан!

“Манчестер Сити”нинг хоратиялик тажрибали ярим ҳимоячиси Матео Ковачич жорий ёзда клубни тарк этадиган навбатдаги юқори савияли футболчига айланиши мумкин.

Хабарларга кўра, Хорватия терма жамоаси юлдузи ва УЕФА Чемпионлар лигасининг тўрт карра ғолиби ўз фаолиятини бошқа клубда давом эттириши кутиляпти.

Клубнинг рекорд хариди бўлган Эллиот Андерсон келганидан кейин ярим ҳимояда ўйин вақти учун рақобат янада кучаядиган бўлди. ОАВ маълумотларига кўра, “Манчестер Сити” раҳбарияти Матео Ковачичга жорий ёзда ўзига янги клуб топишига рухсат берилган.

“Интер”, “Реал” ва “Челси”да ўйнаган футболчиси 2023 йил июнь ойида Пеп Гвардиола ташаббуси билан  25 миллион фунт стерлинг эвазига “Манчестер Сити”га ўтган эди. Шу вақт ичида у клуб сафида 97 та учрашувда иштирок этди.

Бироқ ушбу ўйинларнинг фақат тўққизтаси жароҳатлар билан оғир кечган 2025/26 йилги мавсумга тўғри келди. 32 ёшли футболчи тўпиқ жароҳати сабаб майдондан четда қолди. Бу вақтда “Сити” Англия кубоги ва Англия лигаси кубогида ғолиблик учун курашаётган эди.

Football Insider нашрининг хабар беришича, хорватиялик футболчи энди “шаҳарликлар” учун кераксиз, деб ҳисобланмоқда ва трансфер ойнаси ёпилишидан олдин Манчестерни тарк этиши эҳтимоли жуда юқори.

“Манчестер Сити” ярим ҳимояси бу ёзда “Ноттингем Форест”дан клуб рекорди ҳисобланган 116 миллион фунт стерлинг эвазига сотиб олинган Эллиот Андерсон билан кучайтирилди.

Ковачич 2026 йилги жаҳон чемпионатида ўз ўйини билан яхши таассурот қолдирди. У Хорватия терма жамоасининг Торонтода Португалияга кичик ҳисобда мағлуб бўлган учрашувида энг яхши футболчилардан бири бўлди.

Энди кўп нарса, Энцо Мареска тажрибали футболчини август ойининг биринчи ярмида Осиё турнесига жалб қилиши ёки уни бу йиғинга чақирмаслигига боғлиқ.

Мазкур йиғин янги бош мураббий Энцо Мареска ўз ярим ҳимоячиларидан нимани кутаётганини ва Ковачич унинг режаларига кириш-кирмаслигини кўрсатиб берувчи муҳим мезон бўлади.

Агар Ковачич ҳақиқатдан ҳам кетадиган бўлса, у жорий ёзда клубни тарк этаётган Жон Стоунз, Бернарду Силва ва Натан Аке қаторига қўшилади.