Родри "Барселона"га ўтишга рози бўлди

«Барселона» яримҳимоячи Родридан розилик олди ва унинг трансфери бўйича «Манчестер Сити»га расмий таклиф тайёрламоқда, деб хабар бермоқда Cadena Ser.

Маълумотларга кўра, жаҳон чемпиони «Барселона» бош мураббийи Ханс-Дитер Флик билан суҳбатлашганидан сўнг, каталонияликлар яқин кунлар ичида «Манчестер Сити»га Родри трансфери бўйича расмий таклиф юборишни режалаштирмоқда.

Манбанинг таъкидлашича, «Барселона» 29 ёшли испаниялик футболчини имкони борича тезроқ ўз сафига қўшиб олишни истаяпти ва унинг ўзи ҳам кўчишга розилик билдирган.

Аввалроқ хабар қилинганидек, каталония клуби битимни амалга ошириш учун тахминан 50 миллион евро ажратган, бироқ асосий омил сифатида футболчининг шахсий қарори кутилган эди.

Флик билан суҳбатдан сўнг Родри «Барселона»га ўтишга тайёр эканини билдирди. Энди клуб футболчининг ўзи ва «Манчестер Сити» билан шартларни келишиб олиши керак бўлади.

Родри 2019 йилдан бери «Манчестер Сити» шарафини ҳимоя қилиб келмоқда. У мадридлик «Атлетико» таркибидан инглиз клубига 70 миллион евро эвазига ўтган. Футболчининг амалдаги шартномаси 2027 йил ёзига қадар мўлжалланган.