"Roland Garros"нинг аёллар ўртасидаги беллашувларида ҳам кучлилар номи тобора аниқлашиб бормоқда. Асосий баҳсларнинг навбатдаги кунида юз берган сенсациялар бутун теннис оламини лол қолдирди.

Дастлаб, тарнирда биринчи рақам остида сараланган Симона Халеп ўз учрашувини ўтказди. Польшалик Ива Швёнтекка қарши кортга чиққан руминиялик теннис маликаси сенсацион тарзда мағлуб бўлди. Баҳс давомида ўзига ўхшамаган Халеп ва ўз даражасидан юқори ўйин кўрсатган Швёнтек беллашуви 6:1, 6:2 ҳисобида аутсайдер фойдасига ҳал бўлди.

Яна бир сараланган теннисчининг мағлубияти барчани ҳайрон қолдирди. Нидерландиялик Кики Бертенс чорак финал йўлланмаси учун италиялик Мартина Тревизанга қарши баҳс олиб борди. Асосан тенг курашлар остида кечган учрашувда омад Тревизанга кулиб боқди ва у фаворит мақомидаги рақибасини 6:4, 6:4 ҳисобида мағлуб этди.

3-тартиб рақам остида сараланган Элина Свитолина ўзига билдирилган ишончни оқлай олди. Мезбонлар вакиласини 2 сетда ранжитган Свитолина чорак финал чипталарини нақд қилди. Якуний ҳисоб: 6:1, 6:3.

Нисбатан ўртамиёна теннисчилар сифатида эътироф этилаётган аргентиналик Надя Подороска ҳамда чехиялик Барбора Крейчикова беллашуви қизғин курашларга бой бўлди. Биринчи сетни рақибасига бой берган Надя кейингиларида ташаббусни ўз қўлига олиб, чорак финалда қатнашиш ҳуқуқини қўлга киритди. Баҳс Подоросканинг 2:6, 6:2, 6:3 ҳисобидаги ғалабаси билан якунланди.

Матнда хатолик топсангиз, ўша хатони белгилаб, бизга жўнатинг (Ctrl + Enter)