"Roland Garros". Jokovichga 3, Rublyovga 4 set kifoya qildi

"Katta dubulg‘a" turkumiga kiruvchi navbatdagi musobaqa hisoblanadigan "Roland Garros" turnirida 4-bosqich dastlabki kun bahslari o‘tkazildi.

Turnirning asosiy favoriti Novak Jokovich 4-bosqichda rossiyalik Karen Xachanov bilan kuch sinashdi. 6:4, 6:3, 6:3 hisobida g‘alaba qozongan Jokovich 4-o‘yinda ham o‘z raqiblariga birorta geym yutqazmadi. Shu o‘rinda aytish mumkinki, Xachanov "Roland Garros-2020"da Novakdan 4 ta geym yuta olgan ilk sportchi bo‘lib turibdi. Ajoyib natija!

Jokovich - Xachanov bellashuvidan farqli o‘laroq, gretsiyalik Stefanos Tsitsipas hamda bolgariyalik Grigor Dimitrov o‘rtasidagi uchrashuv ham tomoshabop kechdi. 5-tartib raqam ostida saralangan yunon sportchisi keyingi bosqich masalasini 3 setda hal qilgan bo‘lsa-da, biroz qiynalganini e’tirof etish joiz. Ayniqsa, 2-setni tay-brekda boy bergan Dimitrov, keyingisida aytarli qarshilik ko‘rsata olmadi. Yakuniy hisob: 6:3, 7:6(11:9), 6:2.

Yana bir saralangan raketka sohibi Andrey Rublyov vengriyalik Marton Fuchovich qarshiligini sindira oldi. Bahs oldidan yaqqol favorit sifatida e’tirof etilgan bo‘lsa-da, buni isbotlash unga oson kechmadi. Dastlab, o‘yinni biroz xotirjam boshlagan rus sportchisi ilk setni tay-brekda yutqazib qo‘ydi. Ammo keyingi setlarda o‘zidan kutilgan o‘yinni ko‘rsata olgan Rublyov chorak final chiptalariga ega chiqdi. Yakuniy hisob: 6:7(4:7), 7:5, 6:4, 7:6(7:3).