"Roland Garros". Шварцман - Тим баҳси 5 соатдан узоқроқ давом этди

"Катта дубулға" туркумига кирувчи "Roland Garros" турнирида чорак финалнинг дастлабки кун баҳслари ўтказилди. Теннис олами мухлислари ортда қолган баҳслар ичида энг қизиқарли кечган учрашувга гувоҳ бўлди.

Мусобақанинг 3-тартиб рақам остида сараланган ракетка устаси австриялик Доминик Тим аргентиналик рақиби Диего Шварцманга қарши ўйин ўтказди. Драматик кечган учрашувнинг дастлабки сети тай-брэкда 12-тартиб рақамли Шварцман фойдасига ҳал бўлди. Кейинги икки сетни Тим ютиб олган бўлса-да, чемпионлик учун асосий даъвогарлар сафида эътироф этилаётган теннисчи даҳшатли камбэк қурбонига айланди. 4-сетни тай-брэкда ўз номига ёздириб, тарози паллаларини тенглаштирган Шварцман ҳал қилувчи сетда кучлироқ асабларга эга эканлигини исботлади.

5 соат, 8 дақиқа давом этган беллашув Шварцманнинг 7:6(7:1), 5:7, 6:7(6:8), 7:6,(7:5), 6:2 ҳисобидаги иродали ғалабаси билан якунланди.