"Рома" қишки трансферлар ойнасида ҳужумни кучайтирмоқчи

"Рома" қишки трансферлар ойнасида ҳужумни кучайтиришга ҳаракат қилади. Жамоанинг асосий мақсади биринчи рақамли ҳужумчи олиб келиш. Бунинг асосий сабаби клубнинг страйкерлари Эван Фергюсон ва Артём Довбик мавсумни яхши бошламаганликларида. Шу билан бирга, айни пайтда украиналик футболчи жароҳатда бўлиб турибди. 

Римликлар ҳозирда "Манчестер Юнайтед"дан Жошуа Зиркзе трансфери устида ишламоқда. Клуб уни 40 миллион еврога сотиб олиш банди билан ижара олмоқчи. 6 ойлик ижара учун Италия жамоаси 5 миллион евро тўлаш ниятида. Музокаралар давом этмоқда. 

Зиркзе учун Италия бегона эмас. У "Манчестер Юнайтед"га ўтишидан олдин "Болонья" сафида ҳаракат қилган. 2023/24 мавсумда ҳужумчи клуб таркибида 37 та ўйинда майдонга тушиб, 12 та гол урган. Ушбу мавсумда эса битта гол билан чекланиб турибди. 

"Рома"нинг кейинги трансфери "Атлетико"дан Жакомо Распадори бўлиши мумкин. Рим клуби ҳали аниқ таклиф билан чиққани йўқ, лекин музокаралар кетмоқда. Мадридликлар сафига ёзда келиб қўшилган Распадори ўйин амалиётидан унчалик ҳам хурсанд эмас. Шу сабабли, унга таклиф ёқиши мумкин. 25 ёшли италиялик футболчи Ла Лигада 200 дақиқа ҳаракат қилди. 

"Бўрилар" сафида 2022 йилдан бери тўп тепиб келаётган Пауло Дибала жамоани тарк этиши мумкин. Аммо қишда эмас. Томонлар буни режалаштиришмаяпти. Унинг шартномаси 2026 йилнинг ёзида тугайди ва аргентиналик ҳужумчи ўша пайтда эркин агентга айланиши кутилмоқда.

Дибаланинг кейинги манзили "Бока Хуниорс" бўлиш эҳтимоли бор. Аргентина клуби унга алоқага чиққан ва ёзда эркин агент сифатида футболчини ўз таркибига қўшиб олиш мақсади борлигини айтган. Аммо ҳали сўнгги қарор қабул қилинмаган. 

Хабарда Маттео Мореттонинг инсайдларидан фойдаланилди.