“Рома” Шомуродов бўйича муҳим қарорга келди!
“Рома” клуб хўжайинлари – Фридкинлар оиласи ва римлик мухлислар орзу қилган марра – Европа Чемпионлар лигасига йўлланма олишга ҳар қачонгидан ҳам яқин турибди.
А Серия ўйинлари якунланишига уч тур қолган паллада “Наполи” ва “Интер” чемпионлик масаласини ҳал қилмоқда. “Аталанта” учинчи ўринга мустаҳкам жойлашиб олган.
Қитъанинг энг нуфузли мусобақасига йўлланма берадиган сўнгги – тўртинчи поғонага бир хил тарзда 63 тадан очко жамғарган “Ювентус”, “Рома” ва “Лацио”, шунингдек, улардан бир баллга ортда қолаётган “Болонья” даъвогарлик қилмоқда.
Италия чемпионатининг 36-тур учрашуви кўп нарсага ойдинлик киритиши кутилмоқда. Чунки бу турда “Рома” сафарда учинчи поғонада бораётган “Аталанта” меҳмони бўлади. “Лацио” футболчилари “Олимпико” стадионида йўлланма йўлидаги тўғридан тўғри рақобатчи “Ювентус”ни қабул қилади.
“Рома” халоскорига айланган Клаудио Раньери Бергамода бўладиган муҳим учрашув олдидан тўғри таркиб танлаш борасида бош қотиряпти.
Жорий мавсум давомида “Рома”ни уч мураббий бошқарган бўлса, уларнинг барини энг кўп ўйлантирган масала ҳужум чизиғи бўлиб турибди. Чемпионатнинг ҳал қилувчи палласида Клаудио Раньери таркибда атиги иккита марказий ҳужумчи борлигига қарамай, охирги учрашувларда уларнинг ҳар иккисидан бир пайтда фойдаланишни маъқул кўрмоқда.
Италия матбуоти “Аталанта”га қарши баҳс олдидан Клаудио Раньерининг тактик топилмалари ҳақида фикр юритди. Sports.uz портали ўзбекистонлик футбол ишқибозлари эътиборига “Рома” мураббийлар штабининг режалари таҳлил қилинган мақолани ҳавола этади.
- Клаудио Раньери “Фиорентина” устидан қозонилган ғалабани унутиб, шогирдларини яна майдондаги машғулотларга жалб қилди. Рим “бўрилари” Бергамода “Аталанта”га қарши бўладиган тўқнашувга тайёргарликни бошлаб юборди.
Раньери машғулотларида жароҳат туфайли мавсумнинг қолган қисмини ўтказиб юборадиган Пауло Дибаладан бошқа барча футболчилар иштирок этмоқда.
“Рома” асосий мақсади – Чемпионлар лигасига йўлланма олиши учун учта ҳал қилувчи ўйин қолди. Бу ўринга тўрт клуб даъвогарлик қиляпти. Мавсум охирида ажойиб сценарий юзага келди.
Клаудио Раньери “Аталанта” билан бўладиган сафар ўйинига ҳам “Фиорентина”ни енгган таркибни деряли ўзгартиришларсиз туширадиган бўлди. Бу футболчилар бир тур аввал Миланда чемпион “Интер”ни ҳам енгиб келди.
Демак, Бергамода дарвозани мустаҳкам қўриқлаб келаётган Миле Свилар эгаллайди. Бу посбон жамоанинг 19 та учрашувдан иборат мағлубиятсиз сериясида муҳим роль ўйнаганини таъкидлаш лозим. Ҳимоя вакилларидан уч нафари – Зеки Челик, Жанлука Манчини ва Эван Ндиканинг жойи ҳам кафолатланган. Жаҳон чемпиони Матс Хуммельс футболдан кетиш олдидан бир маротаба бўлса ҳам, Раньери унга имкон беришини кутяпти.
Майдоннинг икки қаноти Матиас Суле ва Анхелиньога топширилади. Марказда Брайан Кристанте ва Мануэль Коне жойлашиши аниқ, плеймейкер вазифаси ё Лоренцо Пеллегрини, ёки катта тажриба эгаси Леандро Паредесга топширилади.
Клаудио Раньери Элдор Шомуродовни яна илк дақиқалардан майдонга туширишга қарор қилган. Ўзбек легионери Артём Довбик билан ҳужум тандемини ташкил қилади. Шунингдек, захирага ўтириб қолган Алексис Салемакерс ҳам мураббийлар штаби Бергамода унга имкон беришини кутмоқда, - деб ёзди ilromanista.eu портали эксперти Якопо Мирабелла.
Таъкидлаш жоизки, Шомуродов “Рома”нинг сўнгги ўйинларида Клаудио Раньерининг майдондаги таянчига айланди. Айниқса, охирги бешта учрашувга эътибор қаратсак, шулардан тўрттасида 29 ёшли ҳамюртимиз самарали ҳаракатларни амалга оширди.
Хусусан, Элдорнинг икки голидан бири “Ювентус” билан ўйинда дурангни таъминлаган бўлса, иккинчиси “Верона” устидан қимматли ғалабани келтирди.
Амалдаги чемпион “Интер” майдонидаги ўйинда Матиас Суле, “Фиорентина” билан баҳсда Артём Довбик айнан Шомуродовнинг пасларидан кейин ғалаба тўпини киритди.
“Аталанта” ва “Рома” ўртасидаги учрашув А Сериянинг 36-турини якунлаб беради. Бу баҳс 12 май куни Тошкент вақти билан 23:45 да бошланади.
Фикрлар