“Рома” Шомуродовнинг рақобатчисидан ҳам воз кечди

Бош мураббий Жозе Моуриньо “Рома” таркибида жиддий ўзгаришлар қилмоқда. Қишки трансферлар ойнаси ёпилгунига қадар пойтахт клубини Элдор Шомуродов, Матиас Вина, Жастин Клюйверт, Рик Карсдорп, Гонсало Вильяр каби ўйинчилар тўлиқ тарк этиши керак.

Италия футболини ёритаётган манбалар португалиялик мураббий тажрибали ҳужумчи Стефан Эл-Шаарави билан ҳам хайрлашишга тайёрлигини билдирган.

30 ёшли ўйинчининг амалдаги шартномаси ёзда якунланади. Стефаннинг ўзи Римда қолиш истагини билдирган. Бироқ, La Gazzetta dello Sport нашри Рим клуби мутасаддилари Эл-Шааравининг агентлари билан учрашув режалаштирмаганини аниқлади.

Бу клуб хўжайинлари у билан ҳамкорликни узайтирмаслигидан далолат беради.

Стефан Эл-Шаарави худди Элдор Шомуродов каби захира ўйинчини ҳисобланади. Жозе Моуриньо ўзи лозим топган аксарият вазиятларда италиялик футболчи фойдасига танлов қилаётган эди.

Шунга қарамай, Моуриньо бошчилигидаги мураббийлар штабининг Стефан Эл-Шааравига муносабати ошкор бўлди.  Энди бу ўйинчи ҳам ёзда ўзига бошқа иш жойи топиши керак бўлади.