Роналдиньо Бразилия терма жамоасига омад тилади

Бразилия футболи афсонаси Роналдиньо ижтимоий тармоқларда миллий терма жамоага мурожаат қилди.

Собиқ футболчи Жаҳон чемпионати олдидан футболчилар ва мураббийлар штабига омад тилаб, уларни эркин ва ишонч билан ўйнашга чақирди.

"Тайёргарлик жараёнидаги ўша лаҳзаларни соғиндим. Майдонга тезроқ чиқиш истаги ва ҳаяжонни жуда яхши эслайман. Мамлакатимизни яна бир Жаҳон чемпионатида ҳимоя қиладиган барча футболчилар ва мураббийларга энг яхши тилакларимни билдираман. Қувонч ва эркинлик билан ўйнанглар — бутун Бразилия сизлар билан бирга бўлади", — деб ёзди Роналдиньо.

Бразилия терма жамоаси мундиалдаги илк учрашувини 14 июнь куни Марокашга қарши ўтказади. Кейинчалик Карло Анчелотти шогирдлари гуруҳ босқичида Гаити ва Шотландия терма жамоалари билан куч синашади.

Роналдиньо Жаҳон чемпионатларида 2002 ва 2006 йилларда иштирок этган. 2002 йилги мусобақада у Бразилия билан бирга чемпионликни қўлга киритган бўлса, 2006 йилда жамоаси чорак финалгача етиб борган.