Роналдо Мессини тарихдаги энг яхши футболчи деб атади

Аргентина терма жамоаси сардори ва етакчи ҳужумчиси Лионель Месси жаҳон чемпионатидаги рекорд натижалари орқали футбол тарихидаги энг яхши ўйинчига айланди. Бу ҳақда Бразилия терма жамоаси таркибида икки карра жаҳон чемпиони бўлган Роналдо ўз фикрини билдирган. Унинг сўзлари Mundo Deportivo нашри томонидан келтирилган.

ТАССнинг ёзишича, Месси жаҳон чемпионати гуруҳ босқичида Жазоир терма жамоасига қарши ўйинда (3:0) хет-трик қайд этди. Шу тариқа аргентиналик футболчининг жаҳон чемпионатлари доирасидаги голлари сони 16 тага етди. Бу кўрсаткич бўйича у Мирослав Клозе билан тенглашди. Илгари Клозе жаҳон чемпионатлари тарихида энг кўп гол урган футболчи сифатида якка ўзи пешқадам эди. Рўйхатда иккинчи ўринни 15 та гол билан Роналдо эгаллаб турибди.

"Месси майдонга ҳар сафар тушганида, қолган ҳамма нарса тарихга айланади, ўйини эса ўзига хос нафосат касб этади. Энди яшириниб юриш, иккиланишни тўхтатиш керак – у барча даврларнинг энг яхши футболчиси эканини тан олиш вақти келди. У ҳар мавсумда ва жаҳон чемпионатида юқори даражада ўйнашда давом этмоқда, шунга қарамай, унинг маҳоратига нисбатан шубҳалар ҳали ҳам учраб туради. Бу кеча унутилмас, тарихий кеча бўлди ва у абадий тарихда қолади", – деди Роналдо.

38 ёшли Месси 2023 йилдан буён Шимолий Америка Бош футбол лигаси (MLS)да иштирок этувчи "Интер Майами" клуби шарафини ҳимоя қилмоқда. У Европа футболида французнинг "Пари Сен-Жермен" ва испаннинг "Барселона" жамоалари таркибида ўйнаган. "Барселона" сафида тўрт марта Чемпионлар лигасида, уч мартадан УЕФА Суперкубоги ва клублар ўртасидаги жаҳон чемпионатида ғолиб чиққан.

Ҳужумчи 2022 йилда жаҳон чемпиони, 2014 йилда жаҳон чемпионати финалчиси, 2008 йилда Олимпиада чемпиони, 2021 ва 2024 йилларда икки карра Америка кубоги соҳиби бўлган. Месси шунингдек, "Олтин тўп" мукофотлари сони бўйича ҳам рекордчи ҳисобланади – уни саккиз марта қўлга киритган.