Роналду: Аҳмоқлар футболни тушунмай, ақл ўргатади!

Португалия терма жамоаси сардори Криштиану Роналду Португалиядаги спортга ихтисослашган подкаст иштирокчиларининг танқидларига жавоб қайтарди.

Блогерлар подкаст давомида 25 ёшида Европадан кетиб, Роналду ўйнаётган “Ан-Наср”га кўчиб ўтган Жоау Феликснинг танловини танқид остига олган эди.  Иштирокчилардан бири Феликснинг “Ан-Наср”га ўтганини шармандалик, деб атаган.

- Аҳмоқлар, футболни умуман тушунмайди, лекин ақл ўргатади, - деб ёзди Криштиану Роналду ушбу подкастга қолдирган изоҳида.

Жоау Феликс ёзги трансферлар даврида “Челси”дан “Ан-Наср”га кўчиб ўтди. Бу трансферда Криштиану Роналду ҳал қилувчи ролни ўйнагани айтилмоқда.

“Ан-Наср”га келганидан бери барча турнирларда бешта учрашув ўтказган Жоау Феликс рақиблар дарвозасини тўрт бор ишғол қилди. Португалиялик футболчининг риёдликлар билан тузган шартномаси 2027 йилнинг ярмигача давом этиши белгиланган.