Роналду: Мен яна йиғлайман!

Португалия терма жамоаси ва “Ан-Наср” клуби ҳужумчиси Криштиану Роналду профессионал футболчилик фаолиятини тугатишига оз вақт қолганини тан олди.

- Тез орада тугатаман. Шунга тайёр бўламан, деб ўйлайман. Жуда оғир бўлишини ҳам биламан.

Йиғлайманми? Ҳа, мен ҳеч қачон ҳиссиётларимни яширмайман. Чунки ростгўйман.

Фаолиятимни тугатиш жуда қийин бўлади, лекин мен бунга 25, 26, 27 ёшимдан бери тайёрланиб келяпман, - деди 40 ёшли ҳужумчи.

Криштиану Роналдунинг “Ан-Наср” билан амалдаги шартномаси 2027 йилнинг ёзигача давом этади. Айни пайтда португалиялик юлдуз расмий учрашувларда 952 та гол урган.

Футбол жамоатчилиги Роналду қачон минглик маррани забт этишини кутмоқда. Жаҳон футболида бирорта ўйинчи Криштианучалик кўп тўп киритмаган.