Роналду Месси учун жамоасини ўзгартиради

“Ан-Наср” юлдузи Криштиану Роналдунинг жамоадаги келажаги мавҳум бўлиб турибди. Риёдликлар португалиялик футболчи билан 30 июнь куни тугайдиган шартномани узайтимоқчи.

Шунга қарамай, Роналдунинг режаси бироз бошқача шакллана бошлади. Келаси ой қирқ ёшни қаршилайдиган юлдуз "Ан-Наср" билан нуфузли совринларга эга чиқа олмаслигига амин бўлди. У клуб раҳбариятидан таркибни кучайтиришни талаб қилган.

Бироқ Криштианунинг олдида янги вариант пайдо бўлди. “Ал-Ҳилол” жамоага ёрдами тегмаган Неймар ўрнига Саудия Арабистонида ҳам тинимсиз гол ура олишини исботлаган Роналдуни ўз таркибига қўшиб олмоқчи.

Совринларни яхши кўрадиган Роналду “Ал-Ҳилол”га эркин агент сифатида кўчиб ўтса, янги форматда ташкил қилинадиган клублар ўртасидаги жаҳон чемпионатида иштирок этиш имконига  эга бўлади. “Ал-Ҳилол” футболчилари “Ан-Наср”дан фарқли равишда бу мусобақа йўлланмасини қўлга киритган.

Клублар ўртасидаги жаҳон чемпионатида яна Роналду ва Лионель Мессининг бевосита рақобатини кўришимиз мумкин. Чунки бу турнирда аргентиналик юлдуз “Интер Майами” таркибида тўп тепади.