Роналду термадан қачон кетишини айтди

“Ан-Наср” клубининг  39 ёшли ҳужумчиси Криштиану Роналду қайси ҳолатда Португалия терма жамоасидаги халқаро фаолиятини якунлашини маълум қилди.

- Ҳозир мен ўзимни терма жамоа учун қадрли ўйинчи эканимни ҳис қиляпман. Буни бош мураббий муносабати ҳам тасдиқлаб турибди.

Агар келажакда терма жамоадаги аҳамиятимни йўқотсам, биринчи бўлиб кетаман. Кетсам ҳам, тоза виждон билан кетаман.

Мен кимлигимни, нималарга қодир эканимни, нима қилаётганимни ва буларни қачонгача давом эттиришимни яхши биламан, - деди Криштиану Роналду.

Роналду халқаро миқёсда энг кўп учрашув ўтказган ва энг кўп гол урган ўйинчи ҳисобланади. Португалия терма жамоасида  212 маротаба майдонга тушган тўпурар рақиблар дарвозасини 130 маротаба ишғол қилган.