Роналдунинг қачон майдонга тушиши маълум бўлди

Саудия Арабистонининг "Ан-Наср" клуби  футболчиси Криштиану Роналду иш ташлашни тўхтатди ва жамоа сафида ўйнашни давом эттиришга тайёр. Бу ҳақда А Бола нашри хабар берди.

Аввалроқ, португалиялик футболчи клуб раҳбариятидан норозилиги ва Саудия Арабистони давлат инвестиция жамғармасининг ўзи ҳомийлик қилаётган рақобатчи клублар  "Ал-Ҳилол," "Ал-Иттиҳод" ва "Ал-Аҳли"га нисбатан кам сармоя киритаётгани сабабли майдонга тушишдан бош тортаётгани маълум қилинганди. Қайд этилишича, агар яқин ҳафталарда бундай кафолатлар тақдим этилмаса, Роналду жамоани тарк этади.

Маълумотларга кўра, ҳужумчи  бойкотни тўхтатган. 41 ёшли португалиялик 11 февраль куни Осиё Чемпионлар лигаси плей-офф босқичидан ўрин олган Туркманистоннинг "Аркадағ" жамоасига қарши ўйинни ўтказиб юборади, аммо Саудия Арабистони чемпионатининг 22-туридан ўрин олган "Ал-Фатеҳ"га қарши сафар ўйинида майдонга тушади.