Роналдунинг устидан кулиб ташлашди

Франция терма жамоаси ва “Баврия”нинг собиқ футболчиси Франк Ребери “Ан-Наср” юлдузи Криштиану Роналдунинг гапига муносабат билди.

Португалиялик футболчи “Олтин тўп” соҳиби албатта Европа Чемпионлар лигасида ўзини кўрсатган ва қитъанинг энг нуфузли мусобақасида ғолиб чиққан бўлиши кераклигини айтган эди.

Франк Рибери ижтимоий тармоқдаги саҳифасида “Нима, “Олтин тўп”ни олиш учун Чемпионлар лигасида ғолиб чиқиш шартми?” деган изоҳ қолдириб, унинг ортида бир неча кулгили смайлларни ҳам қўшиб қўйди.

Франциялик футболчи бу саволни бекорга қўйгани йўқ. 2013 йили ФИФА ва France Football “Олтин тўп”га Криштиану Роналдуни лойиқ топди. Танловда Лионель Месси иккинчи, Франк Ребери учинчи ўринни эгаллади.

Қизиғи шундаки, Рибери ўша мавсум “Бавария” сафида Чемпионлар лигаси, Бундеслига, Германия кубоги ва Суперкубогини қўлга киритган эди. Бироқ “Олтин тўп”да бу натижалар инобатга олинмади.