Румин гўзали чемпионлик ҳимоясини бошлади

Руминиялик теннисчи Симона Халеп Париж шаҳрида ўтаётган Франция очиқ чемпионатидаги илк учрашувини муваффақиятли ўтказди.

Унга мазкур босқичда австралиялик Айла Томлянович қаршилик кўрсатди. Ўйиннинг илк сетини 6:2 ҳисобида ўз фойдасига ҳал қилган Симона, иккинчи сетда 3:6 ҳисобида имкониятни бой бериб қўйди. Бироқ сўнгги ҳал қилувчи сетда румин гўзали ўйин тизгинини қўлга олди ва рақибига бор-йўғи биттагина геймни совға қилди.

Шу тариқа "Катта дубулға" туркумидаги "Ролан Гаррос" мусобақасининг иккинчи даврасига йўл олган Халеп, энди польшалик Магда Линеттга қарши кортга чиқади.