Рустам Ашурматов Ўзбекистоннинг "ЖЧ-2026"даги иштирокини паст баҳолади

Ўзбекистон миллий терма жамоаси ҳимоячиси Рустам Ашурматов "Kun.uz" нашрига берган интервьюсида Жаҳон чемпионатидан қайтгач, терма жамоага кўрсатилган тантанали кутиб олиш маросими ва мундиалдаги иштирок ҳақида ўз фикрлари билан ўртоқлашди.

"Биз буни кутмагандик. Президент бизга далда берганидан кейин бу тадбир ташкил этилди. Албатта, кайфиятимизни кўтаришга ҳаракат қилишди. Лекин очиғини айтсам, ўзимни ноқулай ҳис қилдим. Нафақат мен, бошқа футболчилар ҳам шундай ҳис қилди. Биз гуруҳдан чиқа олмадик, бирорта ҳам ғалаба қозонмадик, аммо бизни жуда катта тантана билан кутиб олишди.Бизга жуда ноқулай бўлди. Ўйладик: "Нега бизни бунчалик улуғлашяпти?"

Ҳа, биз Жаҳон чемпионатига чиқдик ва унда иштирок этдик. Бу яхши, айниқса, илк бор. Аммо ич-ичимиздан бундай тантанали кутиб олишни қабул қила олмадик. Ростини айтяпман. Шунга қарамай, қўллаб-қувватлаган барчага катта раҳмат.

Агар жамоага 10 баллик тизимда баҳо берадиган бўлсам, 2 ёки 3 балл қўярдим. Чунки 11 та гол ўтказиб юбордик — бу жуда кўп. Яна қайси жиҳат учун юқорироқ баҳо беришим керак? Ҳа, биз Жаҳон чемпионатига чиқиб, бутун халқимиз, бутун Ўзбекистоннинг орзусини амалга оширдик. Колумбия ва Португалиядан мағлуб бўлганимиздан кейин ҳам мухлислар бизга ишонишди. Лекин барибир биз мағлуб бўлдик", — деди Ашурматов.