Салибанинг жароҳати кутилганидан ҳам жиддийроқ бўлиши мумкин

Лондоннинг «Арсенал» жамоаси ва Франция терма жамоаси марказий ҳимоячиси Вильям Салиба жиддий жароҳат туфайли узоқ муддат майдондан четда қолиши мумкин.

Маълум бўлишича, футболчи анча вақтдан бери умуртқа суягидаги жароҳат билан ўйинларга тушиб келган. Катта юклама оқибатида унинг соғлиги бунга дош бермади ва у Жаҳон чемпионати-2026 ярим финалида Испанияга қарши ўйиннинг илк бўлимиёқ майдонни тарк этишга мажбур бўлди. Энди Салибага жарроҳлик амалиёти зарур. Журналист Чарльз Уоттс маълумотига кўра, француз ҳимоячисининг тикланиш жараёни дастлабги ҳисоб-китобларга нисбатан ҳам кўпроқ вақт талаб қилиши эҳтимолдан холи эмас. Илк башоратларга биноан, у камида йил охиригача майдонга қайтолмайди, аммо шифокорлар реабилитация янада чўзилиб кетишидан хавотирда.

Яқин кунларда Вильям Салиба «Арсенал» ихтиёрига қайтиб, қўшимча тиббий кўрикдан ўтади. Шундан сўнг унинг тўлиқ тикланиши учун аниқ муддатлар белгиланади.