Саудия сафари қимматга тушди: Мессидан воз кечишди!

“Пари Сен-Жермен” раҳбарияти жамоа ҳужумчиси Лионель Месси билан шартномани узайтириш фикридан қайтди, деб хабар тарқатди L'Equipe нашри.

Аргентиналик юлдузнинг амалдаги шартномаси 30 июнь куни якунланади. Парижликлар ҳамкорликни узайтириш бўйича ўз таклифларини берган ва музокарани давом эттираётган эди.

Яқинда Месси Саудия Арабистони туризм элчиси мажбуриятини бажариш учун ушбу мамлакатга келганди. Кейинроқ, футболчи бош мураббий Кристоф Галтье ва спорт директори Луиш Кампуш рухсатисиз сафарга чиққани ошкор бўлди.

Француз матбуоти клуб Мессини икки ҳафтага жамоадан четлатганини ёзмоқда. Аргентиналик журналист Мартин Арело футболчига санкциялар ҳақида ҳеч қандай маълумот берилмаганини таъкидлаяпти.

ПСЖ қимматбаҳо футболчига иш таклиф қилаётган Европадаги икки жамоадан бири эди. Мессини қайтаришга уринаётган “Барселона” ҳали трансфер қилиш имконини топа олгани йўқ.