Саудияликлар билан трансфер “ўйини”ни Винисиуснинг агентлари бошлагани ошкор бўлди

Саудия Арабистони клубларининг Винисиус Жуниорни олишга ҳаракат қилаётган “Реал”ни безовта қилаётган энг долзарб масалалардан бири ҳисобланади.

Гарчи клуб ва футболчи ўртасидаги шартномаси 2027 йилнинг ёзигача давом этиши белгиланган бўлса-да, саудияликлар таклиф қилаётган маош 24 ёшли футболчининг бошини “айлантириб” қўяпти.

Marca нашрининг аниқлашича, бу ишда Винисиус Жуниорнинг агентлари – Фред Пенья ва Тиаго Фрейтаснинг қўли борлиги ошкор бўлди. Бу икки мутахассис 2023 йили Саудия Арабистони Профессионал лигасининг ўша даврдаги бош директори Саад Ал-Лазизга мурожаат қилган.

Ўзаро учрашув чоғида агентлар Винисиуснинг Саудия Арабистони чемпионатига  трансфери бўйича музокарага тайёр эканликларини маълум қилган.

Ана ўшандан бери шайхлар айни пайтда жаҳон футболининг энг ёрқин ҳужумчиларидан бири бўлиб турган ўйинчини ўз чемпионатларига олиб кетиш пайида юрибди.