Шомуродов жаҳон чемпионатидаги мақсадларни ошкор қилди
2026 йилнинг ёзида АҚШ, Канада ва Мексика яшил майдонларида ташкил этиладиган навбатдаги жаҳон чемпионатида Ўзбекистон миллий терма жамоаси ўз тарихида илк бор иштирок этади.
Ўзбекистон миллий терма жамоаси сардори ва энг зўр тўпурари Элдор Шомуродов ФИФА матбуот хизматига берган эксклюзив интервьюсида жамоанинг 2026 йилги жаҳон чемпионатига тайёргарлиги ва келажакдаги режалари ҳақида гапирди.
“Болалигимда терма жамоамиз мундиалга чиқа олмаганида мухлислар хавотирга тушганини яхши эслайман. Бугун вазият бутунлай бошқача. Президентимизнинг спортга эътибори, яратилган шароитлар туфайли мухлисларнинг жамоамизга ишончи ортди. Футболчиларимиз Европанинг энг кучли клубларида ўйнай бошлади”, - дея фикр юритди ҳужумчи.
Элдор Шомуродовнинг сўзларига кўра, бўлажак жаҳон чемпионати Ўзбекистон учун алоҳида аҳамиятга эга.
Шомуродовнинг ўзи эса, нафақат миллий терма жамоанинг етакчи тўпурарига, балки бутун минтақа футболи муваффақиятининг рамзига айланди. Унинг Россия, Италия ва Туркиядаги самарали фаолияти ўзбек футболчиларининг жаҳон майдонларидаги рақобатбардошлигини кўрсатади.
Ўзбекистон миллий терма жамоаси “ЖЧ—2026”да Криштиану Роналду етакчилигидаги Португалия ва Хамес Родригес бошчилигидаги Колумбия каби гранд терма жамоалар билан бирга “K” гуруҳидан жой олган. Терма жамоа сардори жамоа рақиблардан қўрқмаслигини ва турнирдаги иштирокини ўзбек футболининг қудратини бутун дунёга намойиш этиш имконияти сифатида кўришини таъкидлади.
“Вазифамиз — гуруҳдан чиқиш. Биз мамлакат шарафини ҳимоя қилиб, Ўзбекистон кучли жамоа эканини исботламоқчимиз. Кимдир бизни аутсайдер, деб ўйлаши ҳам мумкин, аммо бизнинг мақсадимиз ҳаммани ҳайратда қолдириш”, - деди футболчи.
Терма жамоа сардорининг таъкидлашича, бутун минтақадан келган мухлисларнинг қўллаб-қувватлаши жамоага қўшимча масъулият ва ўзига хос кайфият юклайди.
“Жаҳон чемпионатидаги иштирокимиз нафақат ўзбекистонлик мухлисларни, балки Марказий Осиё футбол ишқибозларини ҳам хурсанд қилмоқда. Агар муносиб ўйин кўрсатсак, ўзбек футболи бутун дунё бўйлаб янги мухлисларни жалб қилади”, дея қўшимча қилди у.
ФИФАнинг қайд этишича, Ўзбекистон миллий терма жамоаси Криштиану Роналду ва Хамес Родригес каби машҳур футболчилар жамоаларига қарши муносиб кураша олади.
Айни пайтда Элдор Шомуродов Истанбулнинг “Башакшеҳир” клуби шарафини ҳимоя қилмоқда. У Туркия чемпионатида 17 та ўйинда 12 та гол уриб, тўпурарлар пойгасида пешқадамлик қилаяпти. Элдор Ўзбекистон миллий терма жамоасига “Манчестер Сити” ва “Истанбул Башакшеҳир”дан жалб қилинадиган Абдуқодир Ҳусанов, Аббосбек Файзуллаев каби ёш иқтидорлар билан бирга Шимолий Америка майдонларида ўзбек футболининг янги саҳифасини очишга тайёр.
Эслатиб ўтамиз, Элдор Шомуродов Ўзбекистон миллий терма жамоасида 2015 йилдан бери ўйнаб келади. Ҳозирга қадар 30 ёшли ҳужумчи халқаро миқёсда 88 та учрашувда иштирок этиб, рақиблар дарвозасини 43 маротаба ишғол қилган ва терма жамоа тарихида гол уриш бўйича рекордчи ҳисобланади.
Фикрлар