Шомуродов жамоадоши келажагига “хавф” соляпти!
Элдор Шомуродов фаолиятида жиддий ўзгаришлар юз бермоқда. Бунгача охирги икки трансферлар ойнасида “Рома”ни тарк этиши талаб этилган легионеримиз мавсумнинг муҳим палласида жамоанинг асосий фигурасига айланиб боряпти.
Рим клубида асосий марказий ҳужумчи мавқеи ўтган йили Испания чемпионатида тўпурар бўлган ва 30 миллион евродан ортиқроқ маблағ эвазига “Рома”га олиб келинган Артём Довбикка тегишли эди. Клуб хўжайинлари украиналик форвардга жуда катта ишонч билдиргани учун ўтган мавсумларда жамоада ўйнаган Андреа Белотти, Тэмми Абрахам, Сардор Азмун, Ола Сольбаккен ҳамда Ромелу Лукаку каби марказий ҳужумчиларга жавоб бериб юборди.
Жамоа ихтиёрида Довбикдан ташқари фақат битта марказий ҳужумчи – Элдор Шомуродов қолди. Спорт директори Флоран Гисольфи ўзбек футболчисидан ҳам қутилиб, ўрнига бошқа ижрочи олиб келиш ҳаракатида юрган эди.
Элдор ўз ҳаракатчанлиги эвазига Клаудио Раньери бошчилигидаги мураббийлар штаби ишончини оқлай олди. Энди ҳамюртимиз жароҳатларга мойил бўлиб қолган Довбикнинг асосий таркибдаги кафолатланган ўрнига хавф сола бошлади. Буни бир неча манбалар ва экспертлар эътироф этмоқда.
- Икки мавсумни “Специя” ва “Кальяри”да ўтказиб келган Элдор Шомуродов “Рома” асосий таркибидан жой олишига яқингача ҳеч ким ишонмас эди. Лекин бугунги кунга келиб, ўзбек легионери жамоанинг асосий ҳужумчиси Артём Довбикка кучли рақобат туғдирмоқда. Шомуродов муқим ўйин амалиётига эга бўлиш учун бор имкониятини ишга соляпти.
Шомуродов охирги беллашувларда Довбикка рақобатга эътиборлироқ бўлиши кераклигини ва акс ҳолда у асосий таркибдаги жойидан айрилиб қолиши мумкинлигини кўрсатди, - деб ёзмоқда Corriere dello Sport нашри.
“Рома”даги вазиятни кузатиб бораётган таниқли журналист Энрико Камелио ҳар икки форвардни таққослаб, кўп жиҳатдан устунлик Элдор Шомуродов томонида эканини таъкидлади. Хусусан, бу мутахассис ўзбек футболчисининг техникаси анча кучли, деган хулосага келди.
- Менинг хулосамга кўра, Шомуродов Довбикка қараганда тўпни анча яхши назорат қилади. Украиналик футболчи ҳар доим ҳам тўпни мукаммал даражада тўхтатиб, жамоадошларига ёрдам бера олмайди. Буни бир неча учрашувда кўрдик. Аслида Довбикдан кўпроқ нарса кутгандик, - деди Энрико Камелио Radio Lo Sport эфиридаги чиқишида.
Бундан ташқари, яқинда Италия терма жамоаси афсонаси Анжело Ди Ливио “Рома” бош мураббийи Клаудио Раньери ўзбек футболчисини мунтазам бошланғич таркибда ўйнатиши кераклигига ишора қилди.
- “Рома”нинг ҳозирги таркиби А Серия жадвалида янада юқорига кўтарилишга ва Европа лигасида бош соврин учун курашишга қодир. Кейинги учрашувларда ҳужум чизиғида Элдор Шомуродовнинг ўйнаётгани жуда тўғри қарор бўлди. Агар мен Клаудио Раньерининг ўрнида бўлганимда ўзбек футболчисини мунтазам бошланғич таркибда майдонга туширган бўларди, - деди Анжело Ди Ливио.
Таъкидлаш жоизки, самарадорлик статистикаси бўйича устунлик Довбик томонида. Украиналик ҳужумчи барча турнирларда 33 маротаба майдонга тушиб, жами 2415 дақиқа тўп тепган ва бу вақт ичида 13 та гол, тўртта ассист қайд этган.
Элдор Шомуродов эса, мавсум давомида 23 та учрашувда қатнашиб, умумий ҳисобда 742 дақиқа ўйнади ва тўртта гол, учта самарали пас муаллифи бўлди.
Экспертлар ўзбек футболчиси жамоавий ўйин жиҳатидан устунлигини, майдонда ҳужум чизиғи вакиллари – Пауло Дибала, Матиус Суле, Томмазо Бальданци билан яхши тил топиша олаётгани, нафақат ҳужумларни якунлаш, балки уларни ташкил этишда жонбозлик кўрсатаётгани, мураккаб вазиятларда беллашув давомида бурилиш ясашни уддалаётганини юқори баҳолашяпти.
Фикрлар