Ҳали бунақаси бўлмаган эди: Шомуродов янги рекорд ўрнатади!
Италия А Сериясининг 27-турида “Рома” ўз мухлислари кўз ўнгида лига дебютанти “Комо”ни қабул қилади. Бу учрашув римликлар учун жуда катта аҳамиятга эга.
“Бўрилар” янги йили А Серияда ҳали мағлуб бўлгани йўқ. Мағлубиятсиз серия ўтган йилнинг декабридан бири давом этяпти. Клаудио Раньери шогирдларини таслим қилган охирги жамоа айнан “Комо” бўлади.
Сеск Фабрегас жамоаси 15 декабрь куни пойтахтликларни иккита гол билан ортга жўнатиб юборган эди.
Ўшандан бери “Рома” еттита ғалаба ва учта дуранг қайд этди. Кетма-кет ўнта беллашувдан бери бу жамоа рақиблар дарвозасини ишғол қилиб келмоқда.
Биз учун қувонарлиси, Элдор Шомуродов мавсумнинг энг муҳими палласида жамоасининг асосий ўйинчиларидан бирига айланди. “Рома” ҳали давом этаётган муваффақиятли серия самарасида Европа кубоклари йўлланмаси учун курашаётган жамоаларга етиб олди. Шу боис, “Комо”га қарши баҳсда пойтахтликлар уч очко олиши сув ва ҳаводек зарур.
“Рома” фаолиятини алоҳида эътибор билан ёритиб келаётган vocegiallorossa.it сайти Элдор Шомуродовнинг жамоадаги мавқеи тобора ошиб бораётгани ҳақида маълум қилди.
- Ўзбек футболчиси “Рома”га келганидан бери пойтахтдаги саргузаштларининг энг ёрқин қисмини ўтказмоқда. Энди у ўйин охирида бир неча дақиқагагина майдонга тушаётгани йўқ. Бошланғич таркибдан жой олмоқда.
Мавсумнинг муҳим палласида жамоа ҳужум чизиғидаги бор масъулият айнан ўзбекистонлик форварднинг зиммасига юклатилган.
Элдор 2021 йили “Рома”га олиб келинганидан бери ҳали ҳеч қачон бу қадар муҳим ўйинчи ҳисобланмаган.
Бунгача “Специя” ва “Кальяри”да ўйнаб келган 29 ёшли ҳужумчи январда “Венеция”нинг янги ўйинчисига айланиши арафасида турганди. Лекин “Айнтрахт” билан учрашувдаги қаҳрамонлиги ҳаммасини ўзгартириб юборди. Асосий форвард Довбикнинг сафдан чиққани ҳам Элдорнинг фойдасига ишлаяпти.
Мавзуга оид бир неча факт:
Аввалги турда “Монца” дарвозасига киритилган тўп Элдор учун “Рома”да биринчи бўлимда ўрилган иккинчи гол сифатида қайд этилди.
Клаудио Раньери “Комо”га қарши баҳсда 14-рақам эгасини яна илк дақиқадан жангга ташлайди. Бу “Рома” ҳужумчиси учун А Серияда кетма-кет учинчи учрашувда бошланғич таркибда майдонга тушган биринчи ҳолат ҳисобланади.
Агар Европа лигаси доирасида “Порту”га қарши беллашувда ҳам асосий 11 футболчи сафидан ўрин олганига эътибор қаратсак, демак Элдор “Рома”га келганидан бери илк бор қаторасига тўртта беллашувда ўйинни бошлаб беряпти, - деб ёзди vocegiallorossa.it сайти.
Дарҳақиқат, Элдор Шомуродов февраль ойининг ўзида битта гол ва иккита ассист муаллифи бўлди. Бундан ташқари бир неча голли вазиятлар яратишда қатнашди. Энди ўзбек ҳужумчиси самарали ҳаракатларини нафақат А Серияда, балки Европа лигасининг навбатдаги босқичида Бильбаонинг “Атлетик” клубига қарши учрашувларда ҳам давом эттириши талаб этилади.
Элдор Шомуродов асосий таркибда майдонга тушиши кутилаётган “Рома” ва “Комо” ўртасидаги учрашув 2 март куни Тошкент вақти билан соат 22:00 да бошланади.
Фикрлар
биронта янгилик йук, битта нарсани чайнавурасанлар-ми?