Шомуродов “танк

Россия футболи таҳлилчилари аксарият клубларни бирлаштириб турадиган антиқа бир хусусиятни топди.  Уларнинг фикрига кўра, премьер-лига жамоаларнинг аксарияти “танк” ҳужумчиларни орзу қилар экан.

Мутахассислар “танк” деганда, илгари “катта ҳужумчи”, “оғир форвард”, “таран футболчи” деб қўлланилган аслида баланд бўйли, жисмонан бақувват ҳужумчиларни назарда тутаётгани айтилмоқда.

Экспертлар бугунги кунда “танк” ҳужумчиларни ўйнатиш Россия футболида жуда оммалашиб, мода даражасига кўтарилганини таъкидламоқда. Улар премьер-лигадаги жамоалардан ўнтасида ана шундай “катта ҳужумчилар” борлигини аниқлаб, уларнинг рўйхатини эълон қилди.

Хусусан, Остон Ўрунов тўп сураётган “Спартак”да Александр Соболев, “Зенит”да Артём Дзюба,  “Сочи”да Антон Заболотний, “Динамо”да Николай Комличенко, ЦСКАда Адольфо Гайч, “Ахмат”да Владимир Ильин, “Локомотив”да Эдер, “Рубин”да Жорже Деспотович, “Арсенал”да Евгений Луценко ва ниҳоят “Ростов”да Элдор Шомуродов мураббийлар орзу қиладиган ана шундай “танк” ҳужумчилар рўйхатидан жой олди.

e36ad2938e85ea02fd6f94e3947f1505f0f9b0a5

Агар Остон Ўрунов ҳам ҳужумда ўйнаганида ўзининг жисмоний кўрсаткичлари, бўй-басти ва қуввати билан Россия чемпионатининг энг бақувват “танкларидан” бўларди.

Таҳлилчилар таран типидаги ҳужумчилар мураббийларга турли тактик ғояларни қўллашда катта имконият яратиб беришини алоҳида таъкидлайдилар. Бу типдаги форвардлар қанотлардан, стандарт вазиятлардан ёки майдоннинг ичидан юқорилаб ошириладиган тўпларни дарвозага жойлашда самарадорликни таъминлаб беради. Қолаверса, “иккинчи қават”даги яккакурашларда, рақиб мудофаасини “ёриб” ўтишда, ҳимоячини “босиб” етишда ҳам уларнинг имконияти бўй-басти сингари юқори ҳисобланади.

Баланд бўйли ҳужумчиларни корпус билан суриб ташлаш ёки улардан тўпни олиб қўйиш ҳимоячилардан катта юрак, анчагина маҳорат, чаққонлик ва албатта, эҳтиёткорликни талаб этади. Мана шу ва бошқа ҳислатлари учун ҳам “танк” ҳужумчиларга талаб катта.

Бундан ташқари, бўйи “таранлардан” пастроқ, лекин жисмонан бақувват ҳужумчилар ҳам бор. Бу типдагилардан Владимир Дядюн “Химки”да, Александр Карапетян ва асли Бухорода туғилган Владимир Обухов “Тамбов”да фаолият юритмоқда. 

Шу ўринда, мутахассислар “танк” ҳужумчилардан кўпроқ самара олиш учун уларнинг ёнида тезкор ва техникаси кучли форвардлар ҳам бўлиши кераклигига алоҳида эътибор қаратди. Хусусан, Артём Дзюбага олдинги чизиқда Сардор Азмун катта ёрдам беради ва бу жуфтликнинг “Зенит” муваффақиятларида ҳиссаси беназир. “Спартак”да Соболев ва Жордан Ларссон, “Динамо”да Николай Комличенко ва Силвестр Игбун каби ҳужум жуфтликлари тўп суради. “Ростов”да кейинги пайтда Шомуродовнинг ишлари юришмаётганига балки Сардор Азмундек чаққон шерик йўқлиги сабабдир. Энди буни мураббию мутахассислар билади.

Россия премьер-лигасининг олтита турида киритилган голлардан 29 таси айнан стандарт вазиятлардан оширилган тўплар орқали киритилди. Қарши ҳужумчилардан атиги учта гол урилганини инобатга олсак, бу статистикада “танк”ларнинг қудрати яққол намоён бўлади.

Яна бир факт. Унга кўра, “иккинчи қаватдаги” курашларда энг кўп ғолиб чиққан футболчилар ҳам айнан “таран” типидаги ҳужумчилар - Соболев, Комличенко, Луценко, Шомуродов ва Заболотний экан.

rue26cf3e4223_1

Россия чемпионатидаги мураббийларнинг севимли тактикаларидан бири узун паслар бўлиб қолмоқда. Бу паслардан, асосан рақиб дарвозасига бўлган масофани тезроқ босиб ўтиш ва ҳимоячиларни ғафлатда қолдириш мақсадида қўлланилмоқда. Ва айнан шу тактикада бўйи баланд ҳужумчиларга эҳтиёж янада ортади.

Хулоса қилиб айтганда, рус жамоалари мураббийлари олдинги чизиқда ҳамон “танкларни” қўллаш тактикасидан воз кечгани йўқ. Шундай экан, Россияда бўйи баланд ҳужумчиларнинг бозори гуркираб қизийверади.

Шомуродов, Жалолиддинов ва Ўруновга Европа эшиги очиладими?

Легионерларимиз кубок учун курашади. 20 миллион мукофоти ҳам бор!

Шомуродов – УЕФА Чемпионлар лигаси иштирокчисининг асосий нишонига айланди!

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар