Шомуродов – УЕФА Чемпионлар лигаси иштирокчисининг асосий нишонига айланди!

Бельгиянинг “Гент” жамоаси Европа чемпионлар лигасининг янги мавсуми олдидан марказий ҳужумчига эҳтиёж сезмоқда. “Гент” бу позицияга “Ростов”нинг ўзбекистонлик ҳужумчиси Элдор Шомуродовни таклиф қилиш фикридан қайтгани йўқ ва уни трансферлар мавсумида асосий нишон қилиб белгилади.

Бу ҳақда мазкур мамлакатнинг нуфузли нашрларидан бири “Voetbal Belgie” хабар бермоқда.

Бельгия чемпионатида кумуш медални қўлга киритиб, Европа чемпионлар лигасига йўлланма олган ушбу клуб 8 июль куни “Ростов”га Элдор Шомуродов бўйича расмий сўров юбориб, трансфер учун беш миллион евро таклиф қилган эди.

“Ростов” клуби раҳбарияти асосий ҳужумчи бўйича дастлабки таклифга рад жавобини берди. Одатда, ҳеч қайси жамоа биринчи сўровдаёқ ишонган футболчисининг трансферига кўнмайди. Шу боис, ростовликлар бошқа таклифларни ҳам кўриб чиқишга тайёр эканини билдирганди.

Энди “Voetbal Belgie” нашрининг хабар беришича, “Гент” раҳбарияти Элдор Шомуродов бўйича иккинчи расмий трансфер сўровини тайёрламоқда ва тез кунлар ичида бу таклиф “Ростов” жамоасига тақдим қилинади.

“Гент” раҳбарияти ҳужум чизиғини кучайтиришга жиддий эҳтиёж сезаётгани эндигина бошланган миллий чемпионатда ҳам билиниб қолди. Бу жамоа ўтган йилги мавсумни иккинчи ўринда якунлаганига қарамай, янги мавсумнинг дастлабки учта учрашувида рақиблари – “Сент-Трюйден”, “Кортрейк” ва “Антверпен”га имкониятни бой берди. Учта учрашувда атиги иккита гол урган гентликлар мусобақа жадвалида охирги – 18-поғонага тушиб қолди. Шу боис, бельгияликлар ўзбек ҳужумчисини имкон қадар тезроқ ўз сафига қўшиб олишга интилмоқда.

Ҳозирча, бу жамоа Шомуродов учун қанча маблағ таклиф қилиши номаълум. Лекин бу дастлабки таклифдан ортиқ бўлади. Чунки Transfermarkt порталида ҳам ҳамюртимизнинг трансфер суммаси кўтарилиб, айни пайтда 6,5 миллион еврони ташкил қилаётганини эълон қилган.

Ўз навбатида, Элдор Шомуродов ҳам фаолиятида кескин бурилиш ясаши керак, деган фикрлар кун сайин кўпайиб бормоқда. Карантиндан сўнг ҳамюртимизнинг ўйинида пасайиш ҳамон давом этмоқда ва унинг голсиз серияси ярим йилдан бери узилгани йўқ. Шомуродов кетма-кет йигирмата учрашувда майдонни голсиз тарк этди.

Маълумотларга қараганда, Элдор Шомуродовга Бельгиядан ташқари Қатар чемпионати ва Россия премьер-лигасининг етакчи жамоаларидан ҳам манфаатли таклифлар бўлмоқда. Бироқ, Элдорнинг ўзи Россияда “Ростов”дан бошқа жамоада ўйнамоқчи эмас. Шунингдек, у Осиёда эмас, балки Европада тўп суришни истамоқда. Унинг орзуларининг рўёбга чиқиши “Ростов” клуби раҳбариятининг қарорига боғлиқ бўлиб қолган. Шомуродовнинг амалдаги шартномаси 2024 йилнинг ёзигача тузилган ва ростовликлар ҳозирча уни қўйиб юборгиси келмаяпти.

Шомуродовни таклиф қилаётган “Гент” ўтган мавсумда – муддатидан аввал якунланган Бельгия чемпионатида иккинчи ўринни эгалаганди. Шу тариқа, бу клуб вакиллари янги мавсумда Чемпионлар лигаси саралашининг 3-босқичида қатнашадиган бўлди.

Қарийб 120 йиллик тарихга эга бўлган “Гент” клуби 30 йилдан буён мамлакат чемпионатининг юқори лигасида иштирок этиб келмоқда. Гент шаҳри шарафини ҳимоя қилаётган жамоа уч маротаба Бельгия кубоги соҳиби бўлган. Шунингдек, беш йил муқаддам “Гент” мамлакат чемпионатида ғолиб чиққан ва Суперкубокни қўлга киритган.

“Гент” Бельгиянинг энг кучли жамоаларидан бири сифатида УЕФА Чемпионлар лигаси ва Европа лигаси каби нуфузли турнирларда иштирок этиб келади.